DF 940

Påfve Urban VI till ärkebiskopen af Uppsala med utnämning af den utaf domkapitlet i Åbo valde kaniken Björn till biskop därstädes, ehuruväl nämnda val strede mot det fria förfogande, påfven förbehållit sig beträffande Åbo biskopsstol vid inträffande ledighet af densamma.

Original på pergament, med underhängande blysignet, svenska riksarkivet.

Urbanus episcopus, seruus seruorum Dei, venerabili fratri archiepiscopo Vpsalensi salutem et apostolicam benediccionem. Ad cumulum tue cedit salutis et fame, si personas ecclesiasticas, presertim pontificali dignitate preditas, diuine propiciacionis intuitu oportuni presidij et fauoris gracia prosequaris. Dudum siquidem bone memorie Johanne, episcopo Aboensi, regimini Aboensis ecclesie presidente nos cupientes eidem ecclesie, cum eam uacare contingeret, per apostolice sedis prouidenciam utilem et ydoneam presidere personam, prouisionem ipsius ecclesie ordinacioni et disposicioni nostre duximus ea uice specialiter reseruandam, decernentes extunc irritum et inane, si secus super hijs a quoquam quauis auctoritate scienter uel ignoranter contingeret attemptari. Postmodum uero prefata ecclesia per ipsius Johannis episcopi obitum, qui extra Romanam curiam diem clausit extremum, pastoris solacio destituta, dilecti filij .. prepositus et capitulum dicte ecclesie, reseruacionis et decreti predictorum forsan ignari, dilectum filium Beronem electum Aboensem, tunc canonicum eiusdem ecclesie in sacerdocio constitutum, in eorum et dicte Aboensis ecclesie episcopum concorditer elegerunt licet de facto, ipseque, reseruacionis et decreti predictorum similiter inscius, eleccioni huiusmodi, illius sibi presentato decreto, eciam de facto consensit et demum, reseruacione et decreto predictis ad ipsius Boronis (!) electi deductis noticiam, huiusmodi negocium proponi fecit in consistorio coram nobis. Nos igitur huiusmodi eleccionem et quecunque inde secuta, utpote post et contra reseruacionem et decretum predicta de facto, ut premittitur, attemptata, reputantes, prout erant, irrita et inania et ad prouisionem ipsius ecclesie celerem et felicem, de qua nullus preter nos ea uice se intromittere potuerat neque poterat, reseruacione et decreto obsistentibus supradictis, ne ecclesia ipsa longe uacacionis exponeretur incommodis, paternis et solicitis studijs intendentes, post deliberacionem, quam super hijs cum fratribus nostris habuimus, diligentem demum ad dictum Beronem, cui de litterarum sciencia, uite mundicia, honestate morum, spiritualium prouidencia et temporalium circumspeccione alijsque uirtutum meritis apud nos fidedigna testimonia perhibentur, direximus oculos nostre mentis, quibus omnibus necnon dictorum .. prepositi et capituli, prefatum Beronem eligencium, concordi uoluntate attenta meditacione pensatis, de persona ipsius Beroni[s], nobis et eisdem fratribus ob dictorum suorum exigenciam meritorum accepta eidem Aboensi ecclesie de dictorum fratrum consilio auctoritate apostolica prouidimus ipsumque illi prefecimus in episcopum et pastorem curam et administracionem ipsius Aboensis ecclesie eidem Beroni in spiritualibus et temporalibus plenarie committendo, jn illo, qui dat gracias et largitur premia, confidentes quod eadem Aboensis ecclesia per ipsius Beroni[s] industriam et prouidenciam circumspectam sub ipsius Beroni[s] electi felici regimine, dextera Domini sibi asistente propicia, salubriter et prospere dirigetur grata[que] in eisdem spiritualibus et temporalibus suscipiet incrementa. Cum igitur, ut idem electus in commissa sibi predicte ecclesie cura facilius proficere ualeat, tuus fauor ei fore noscatur plurimum oportunus, fraternitatem tuam rogamus et hortamur attente per apostolica tibi scripta mandantes, quatenus eundem electum et ecclesiam sibi commissam suffraganeam tuam habeas pro nostra et apostolice sedis reuerencia propensius commendatos in ampliandis et conseruandis iuribus ipsius ecclesie [et] sic eum tui fauoris presidio prosequaris, quod ipse electus tuo fultus auxilio se possit in eiusdem ecclesie regimine utilius exercere, tuque diuinam misericordiam et nostram ac dicte sedis beniuolenciam exinde uberius ualeas promereri. Datum Janue viij idus nouembris pontificatus nostri anno octauo.

Armandus.